Dwi wedi mwynhau popeth am fod yn Swyddog Llawn-Amser yn UMAber. O ymgeisio yn yr etholiadau a mynd allan i siarad â llwyth o bobl na fydden i'n siarad â nhw fel arall, i gael cyfle i weithio'n glòs gyda'r Brifysgol ar faterion pwysig sy'n effeithio ar fyfyrwyr a chael ein llais wedi'i glywed ar lefel uchaf, mae popeth wedi bod yn wych.
Beth wyt ti wedi ei fwynhau am fod yn Swyddog UMAber?
Dwi wedi mwynhau popeth am fod yn Swyddog Llawn-Amser yn UMAber. O ymgeisio yn yr etholiadau a mynd allan i siarad â llwyth o bobl na fydden i'n siarad â nhw fel arall, i gael cyfle i weithio'n glòs gyda'r Brifysgol ar faterion pwysig sy'n effeithio ar fyfyrwyr a chael ein llais wedi'i glywed ar lefel uchaf, mae popeth wedi bod yn wych. Heb amheuaeth, y peth gorau am fod yn Swyddog yw gweld y gwaith rydych chi'n ei wneud yn creu gwahaniaeth i fyfyrwyr yn Aberystwyth, does dim ots os yw'r gwahaniaeth hwnnw'n fawr neu'n fach, a gweld myfyrwyr hapus yn cael llwyth o gyfleoedd y buoch chi'n rhan o'u creu. Mae cael y cyfle i gynrychioli dros 8,500 o fyfyrwyr yn deimlad anhygoel, gwybod bod pobl yn ymddiried ynoch chi i fod yn llais ar eu rhan a sicrhau bod y dewisiadau cywir yn cael eu gwneud ar ran myfyrwyr. Does dim byd yn rhoi mwy o foddhad na hyn.
Beth yw dy 5 hoff atgof o’r flwyddyn?
Pam na allaf i ddewis fy holl atgofion? Fel y dwedais, mae popeth wedi bod yn anhygoel, ond os oes rhaid i mi ddewis y 5 gorau, dyma nhw...
- Lansio ymgyrch #SanauStefan, codi arian ar gyfer MIND Aberystwyth, a sicrhau fod Stefan Osgood yn derbyn gradd er anrhydedd.
- Mynychu Cynhadledd Genedlaethol UCM (a chynadleddau eraill) gan gynrychioli myfyrwyr Aberystwyth ar lefel genedlaethol, a chael fy ethol i Bwyllgor Gwaith Cenedlaethol UCM Cymru.
- Gweld 11 o Gymdeithasau a 3 Unigolyn yn cael eu cynnwys ar y rhestr fer ar gyfer Gwobrau Cenedlaethol y Cymdeithasau, a gweld 2 Gymdeithas yn ennill eu categori, 1 Gymdeithas yn derbyn Cymeradwyaeth Uchel yn eu categori, ac 1 unigolyn yn ennill gwobr am Gyfraniad Unigol.
- Gweithio gyda Naomi ar nifer o fentrau llesiant megis Condomau a Thamponau Am Ddim, ein hymchwil i brofiadau myfyrwyr o wasanaethau iechyd lleol, a chreu Polisi Aflonyddu Rhywiol a Theclyn Reportio Ar-lein UMAber.
- Adeiladu undeb cynaliadwy ar gyfer y dyfodol, gan gynnwys cynnydd yn y grant bloc, sicrhau cyllido CronfaAber ar gyfer amryw o brosiectau UMAber, ail-strwythuro'r staff, adolygiad o rôl y swyddogion, datblygu strategaeth newydd, recriwtio ymddiriedolwyr newydd a gwella'n gyffredinol y ffordd rydyn ni'n gweithio ar ran myfyrwyr.
Cyflawniad mwyaf y flwyddyn (neu'r hyn rwyt ti’n falch ohono)?
Dwi'n credu mai'r peth dwi'n teimlo balchaf ohono eleni yw UMAber yn derbyn Gwobr "Undeb Myfyrwyr Addysg Uwch y Flwyddyn" a Gwobr "Cyfleoedd Myfyrwyr" yng Ngwobrau UCM Cymru 2017. Mae hyn yn deyrnged i'r holl waith eithriadol o galed a wneir gan y swyddogion, tîm y staff a'r myfyrwyr i wneud Aberystwyth yn lle gwych i fod, a gwneud UMAber y gorau i'n myfyrwyr drwy ddarparu cyfleoedd, helpu i greu newid a chynnig cymorth, sy'n cyfoethogi profiadau myfyrwyr ac yn helpu myfyrwyr i gyrraedd eu llawn botensial. Mae eleni wedi bod yn flwyddyn llawn newidiadau, heriau a datblygiadau i UMAber, a dwi'n teimlo'n eithriadol o falch bod popeth rydyn ni wedi'i wneud yn cael cydnabyddiaeth genedlaethol am fod y gorau y gallem ni fod wedi'i wneud ar ran ein myfyrwyr yn ystod y flwyddyn a aeth heibio. Rydw i a'r holl dîm wedi gwneud ymdrech sylweddol y tu ôl i'r llenni i ddatblygu UMAber i fod yr hyn rydyn ni nawr. Dwi'n teimlo'n eithriadol o falch o fod yn Llywydd eleni, a gweld sut mae UMAber wedi tyfu i fod yn undeb ardderchog ar gyfer y dyfodol.
Neges hwyl fawr
Diolch i bawb ohonoch sydd wedi gwneud fy nwy flynedd fel Swyddog yn UMAber yn anhygoel! Yn arbennig pob myfyriwr sydd wedi ymwneud â'r undeb, rydych chi i gyd yn wych! Dymunaf bob llwyddiant i'n holl fyfyrwyr yn ystod eu blynyddoedd nesaf yn Aber, a llongyfarchiadau i bawb sy'n graddio eleni ac yn symud ymlaen i yrfaoedd disglair. Felly hwyl fawr (am y tro), ond mae Aber yn gartref i mi bellach, felly mae'n sicr y byddaf yn ôl i weld beth sy'n digwydd yn y dyfodol, a byddaf yn ceisio cyfranogi yng ngweithgareddau UMAber a'r Brifysgol mewn unrhyw ffordd y gallaf, os oes angen hynny. Felly beth ydw i'n mynd i'w wneud nesaf? Dwi'n symud ymlaen i astudio ar gyfer gradd Meistr mewn Geneteg Clefydau Dynol yng Ngholeg y Brifysgol Llundain (UCL) - felly os ydych chi byth yn yr ardal ac angen unrhyw beth, rydych chi'n gwybod ble bydda i! Byddaf yn sicr o fethu Aber ac UMAber, ond mae fy nghyfnod yma wedi fy mharatoi ar gyfer dyfodol disglair, a dwi'n eithriadol o ddiolchgar i bawb sydd wedi fy helpu ac wedi rhoi cymorth i mi ar hyd y daith.
Gyda chariad,
Lauren x